Falunap

We hawwe in reedlik drokke wike achter de rêch. Fansels moasten we wer oan it wurk.
Jelle hie tiisdei in ôfspraak by de garaazje. Der moasten nije bannen omlein wurde. Goed ôfpraten dat er de middeis komme soe. Se soenen de bannen der om dwaan en Jelle koe der op wachtsje. Om twa oere kaam er: Gjin bannen! Mar gjin probleem, dy soenen se wol even helje. In oere letter kaam er wer. Doch de kofferbak mar iepen, sei de man. Kofferbak iepen, hoesa? Se moatte der ek om. O ja? Prottel, prottel, mar ek dat waard regele.
Woansdeitemiddei hawwe we tegearre 450 doazen fersjoud. Dy wienen tiisdei oankommen mei de frachtauto.
Der komme altyd twa fan it Tsjinsthûs om de doazen te ferdielen. Se hienen ús frege om de doazen op letter te sortearjen. Dat skeelt in protte tiid. De dei derfoar krigen we ek noch in ferrassing. Dy't mei soe foar it Tsjinsthûs koe net mear en no hienen se heit frege. De bern dwers troch alles hinne fansels.
Letter op de middei sieten we op de direktrise te wachtsjen. Sy soe noch in kear op besite komme om it hûs te sjen. It wie hast tiid doe't de bel gong. In jonge foar de doar. Tjitske wie fallen op it sportfjild mei har holle op de grûn. En dat was twee :). Fansels skrokken we, Jelle gau derhinne. Se soe in koprol dwaan mar hie net sjoen dat der in pealtsje yn it paad stie. Eltsenien stie om har hinne. De juf fûn dat we wol even nei dokter moasten. Wat in gelok dat dy krekt delkomme soe. Op it sportfjild hienen se al iis op de foarholle dien. De direktrise hat letter noch even nei har sjoen. Lokkich wie se net mislik en net duzelich. Se krige rêst foarskreaun en dat is lestich foar ús faam. Jûns siet der in geweldich grutte bult op de foarholle dat se is der net knapper op wurden mar fierder giet it bêst.
De direktrise fûn it hûs aardich opknapt en it wie gesellich. Neidat se fuort wie, hat Jelle noch gau mei Ymkje op gymskuon west foar it optreden letter yn de wike.
Tongersdei haw ik mei Feije op skoalreiske west. We gongen mei de bus nei de bistetún yn Nyiregyhaza. Prachtich waar, lekker waarm yn de bus. Der wienen twa bussen want foar elk bern moat der in âlder mei. Boppedat hienen guon fan it personiel ek noch in partner mei. It kin allegearre! Underweis hast in healoere stilstien. Prompt moasten fansels alle bern doe pisje, yn de berm dan mar. Letter die bliken dat se hamburgers helle hienen foar de bern, dy waarden letter útdield. We mochten doe sels witte wêr't we hinne gongen. Om healwei tolven moasten we wer by it restaurant wêze foar it iten. Dat wie allinne foar de bern. Om trije oere krigen de bern noch in ijsje en doe wer op hûs oan. Feije wie sa wurch dat er yn de bus yn sliep foel.
Freed hawwe Jelle en ik mei it personiel spul útsocht foar de Pompoendagen. In hiel feest wie dat! Der kaam fan alles foar it ljocht. Alles ynpakt en klearsetten dan kin it yn de bus mei werom. De middeis gau boadskippe foar it wykein want sneon hienen we dêr gjin tiid foar.
Sneon wie it nammentlik Falunap (doarpsdei). De famkes moasten al om 9.00 oere op skoalle wêze. Alle klassen moasten optrede op it sportfjild. We hawwe ús deroer ferbaasd dat se hjir safolle dissipline hawwe. De bern stienen netsjes yn de rij te wachtsjen en as der wat klearsetten wurde moast dan hoegde de master mar in wink te jaan en se draafden al. De optredens wienen hiel moai. Letter fannewike sille we wat foto's op de site sette. We hawwe ús allinne wol besaud oer ien fan de ferskes dy't brûkt waard. Soldier, soldier don't look down, miskien kenne jim it wol. It giet oer drank en hoeren. Se hawwe net echt nei de tekst harke, tinke wy.
Nei de optredens fan skoalle koenen alle minsken fergees "goulashleves" en "lángos" ite en noch in ijsje nei. Middeis wienen der optredens fan û.o. it orkest fan it bernetehûs en demonstraasjes fan de plysje en de brânwacht. Us bern en de bern fan it tehûs hawwe harren o sa fermakke.Jelle hat meidien oan fuotbal en hat no seare skonken. Jûns wie der dan noch muzyk en om 22.00 fjoerwurk.
We fregen in doarpsgenoat oft se elts jier sa'n doarpsfeest hawwe. Nee, dat wie mar ien kear yn de fjouwer jier. De reden dat der sa'n feest is omdat, no komt de aap út de mouwe, der yn septimber wer in nije boargemaster keazen wurde moat. It is dus eins in ferkapte ferkiezingskampanje. Hy fûn sels de boargemaster wol wat in slijmbal. En wy binne it wol in bytsje mei him iens. Dit wurdt dus allegearre betelle troch de mienskip.
Nei it lêste optreden krigen we ynienen in fikse bui, der binne net in protte minsken droech thúskommen. Sels wy net hoewol't we tsjinoer it sportfjild wenje.
Om 17.00 kaam ús heit oan. Hy sil hjir wer in pear dagen sliepe. Nije wike sil er de doazen mei útsutelje mar wy sille ek in dei mei. En tongersdei meie wy nei ús grutte freon yn Berettyoujfalu. Nije wike kinne jimme lêze hoe't dat ôfrint.
Fannemoarn trouwens noch by Nati west. Se is ûndertusken operearre oan har skonk en sit yn de rolstoel.