De earste wike

It is al in hiel skoft lyn dat we wat skreaun hawwe op dizze side. Mar no’t we hjir wer wat langer sitte, is it miskien wol aardich om te fertellen wat we hjir meimeitsje.
Tiisdei binne we oankaam nei in reis fan trije dagen. Wer even wenne oan de hege temperatuer en de swiere buien dy’t samar opsetten komme. De túnstuollen en skommelbank fleagen al wer troch de loft.
Dizze wike hawwe we brûkt om wat dingen te regeljen. As earste in ynternetferbining. Altyd wer in ferrassing oft dat slagget mar it wie diskear sawier binnen in healoere regele. Kin Jelle teminsten oan it wurk  Fierder hawwe we nije wike in karre nedich om de doazen mei klean en boartersguod út te suteljen. De sjauffeur fan it tehûs wie mei nei Nyirbátor om dit te regeljen mar it slagge net. De iene ferhierder wie net thús de oare hie allinne iepen karren. Doe hat de bêste man yn Nyiregyháza wat foar ús regele. Hy sil moandei mei ús mei om it op te heljen. It is dus noch in ferrassing yn hokker staat de karre ferkeart mar it sil wol goed komme.
Freed binne der 533 doazen ôflevere troch de Stichting Help Oost Europa. Der stienen wol tweintich bern en manlju klear om mei út te laden. We hawwe besocht fuort alles te sortearjen mar ik koe it sa hurd net byhâlde. De sjauffeurs hawwe mei ús iten en moasten dêrnei troch nei Roemenië. De oanhinger hawwe se hjir litten, dy giet nije wike wer mei werom. Wy hawwe op papier alle doazen ferdield en in skema makke. As it goed is, rêde we it krekt op om alles yn 5 dagen derby del te bringen. Dat wurde aardich wat kilometers yn auto, earme berntsjes 
Fansels ek al wer te kuierjen west mei bern fan it tehûs. Dat fine se altyd geweldich. Nije wike hawwe se hjir doarpsfeest, dêr sjogge de bern ek o sa nei út.
Nije wike mear nijs.