Hármincnyolc

We wienen in bytsje te foarbarich mei it nijs dat it waar wol goed wie. It hat nammentlik sneon de hiele dei reind. Hie Jelle moai de gelegenheid om wat oan syn wurk te dwaan.
Juster myn jierdei fierd mei in dei nei Eger, it wurdt suver al tradysje. Lekker in gebakje iten, mei it treintsje nei de wynkelders west (mar se net fan binnen besjoen) en ijs hân. Fan Tjitske hie ik in orizjineel kado. In bon foar in spesjale behanneling fan De Witte Zwaan. Dit is har ‘schoonheidssalon’. Der stie by: voor het kleurrijke gezicht. No, ik kin jimme melde dat it kleurrijk wurden is. Neffens my wienen myn eagen fannemiddei hielendal swart.
Feije woe ek wol graach in gesichtsmasker. “Hat mem ek in piratemasker?” Dúdlik gefal fan miskommunikaasje.
We krije Feije ek mar net oan it ferstân dat Kisléta yn Hongarije leit. Doe’t we juster yn Eger wienen, sei er: “Hee, ik tink dat we noch steeds yn Kisléta binne, se sizze hjir ek jó napot kivánok.”
Undertusken brekt Ymkje har de holle oer de finansjele problemen hjir. Se snapt mar net dat by de earmoedichste hûskes in brommer stiet. Dêr kinne je dan neffens har mar better iten foar keapje. Ik kin har net hielendal ûngelyk jaan.
Yn it tehûs ite alle dagen twa mannen fan de appelfabryk tichtby. Ymkje hat dêr even goed oer neitocht. Sy tinkt dat de manlju dêr ite meie yn ruil foar appels.
Hjoed hienen we de Hiele dei wat motrein. Ricsi hat fannemoarn op besite west en Zsanett en Anniko fannemiddei. We koenen fannemoarn ek wat jild by de direktrise bringe. By dizze tige tank oan eltsenien dy’t dêroan bydroegen hat. Se wie der o sa wiis mei. We hearre noch fan har wat se derfoar keapje sille. We krigen ek te hearren dat de twa rollators dy’t fan ’t hjerst brocht binne yn gebrûk binne by it B paviljoen. Alles komt goed terjochte!
Se binne dan no ek begongen mei de útwreiding fan de skoalle op it terrein. Neffens de manlju sels is it yn oktober klear, de direktrise hâldt in slach om de earm en tinkt fan novimber. Meitsje der dan mar takom jier fan.
Fierder binne se yn it doarp dwaande mei in petysje foar de boargemaster. It skynt dat hy de direktrises fan de beide skoallen ûntslach jaan wol. Dat kin hjir samar. Se sille wol net by deselde politike partij hearre. Ik bin benijd oft de petysje helpt. De âlders binne der nammentlik poer op tsjin dat se samar ûntslein wurde.
Oare kear mear.